 |
| Jadi élmu éta ngawengku tilu aspék, dina haté, dina lisan, jeung tulisan, (ilustrasi foto Pixabay). |
Lain hartina ulah maca tulisan, éta pisan apanan anu munggaran kudu bisa téh. Lantaran manusa hamo misa nalungtik hiji pasualan, eusi dina hiji kitab lamun taya koncina. Nya tangtuna ogé mindahkeun eusi buku atawa kitab kana otak téh ku jalan maca.
Sanggeus kabaca, tuluy ditalaah, dilenyepan, dirarasakeun, kakara maca dadamelan Gusti Alloh ti mimiti maca diri sorangan.
Tina naon urang diciptakeun, kumaha prosesna, nepikeun ka urang teh jadi urang, nu dingaranan manusa.
Tidinya kakara maca dadamelan Gusti anu séjénna, pirang-pirang jajadian nu aya di alam dunya ieu lenyepaneun, tapakuraneun, geuning sakitu éndahna. Nu ahirna haté urang sadar kana kaagungan anjeun-Na.
Tadi ge pan dina ayat nu lungsur ngawitan ka Jungjunan Alam Kangjeung Nabi Muhammad Shalallahu Alaihi Wassalam unggelna teh kieu;
“Baca, kalayan asma-Na Pangeran manéh anu geus ngayugakeun. Nu ngayugakeun manusa tina getih sakeupeul. Baca, karana Pangéran manéh Nu Maha Mulya. Kalayan asmana Gusti Nu Maha Murah. Nu ngawulang ku kalam. Nu ngawulang manusa perkara nu teu dipikanyaho.” (QS. Al 'Alaq: 1-5)
Numutkeun tafsir Ibnu Katsir ieu surat téh ngandung pépéling sangkan manusa sadar kana asal usul dirina nalika diciptakeun, nyaéta tina 'alaqah.
Jeung di antara Kamahamurahan anjeun-Na, nyaéta parantos ngajarkeun ka manusa tina saniskara nu teu dipakanyahona jadi nyaho.
Palebah dieu Alloh parantos ngamulyakeun jeung maparin kahormatan ka manusa ku élmu. Jeung élmu éta nangtukeun ngeunaan darajat anu ngabédakeun antara Abul Basyar (Adam) jeung malaikat.
Sedengkeun élmu éta sakapeung aya dina haté, sakapeung dina lisan, kadang aya ogé dina tulisan leungeun.
Jadi élmu éta ngawengku tilu aspék, dina haté, dina lisan, jeung tulisan, ana pon élmu nu aya dina tulisan tadi ngabuktikeun kamampuhan ngawasa kadua aspék séjénna.
Malah aya hiji asar anu nyebutkeun “Beungkeut élmu éta ku tulisan”. Ogé dina asar disebutkeun singsaha nu ngamalkeun élmu anu dikawasana, maka Alloh baris maparin ka manéhna élmu anu can dipikanyo ku dirina. (herdi pamungkas ti sababaraha sumber)
Post a Comment for "Élmu Nangtukeun Darajat anu Ngabédakeun Antara Abul Basyar Jeung Malaikat..."